Download Hausa Novels,Musics,Videos and Movies for free

FARATAN ZAKI littafi na daya 1 complete hausa novel

Get real time updates directly on you device, subscribe now.

FARATAN ZAKI

littafi na daya 1 complete

na Marubuci Shuraihu Usman

01 of 4 Part 1

Part 1

FARATAN ZAKI
Littafi na daya 1
na Shuraihu Usman
Part A
© Shuraih 99% – 2020
.
Saurayine kyakkyawa tafe bisa kan ingarman doki, yana shara masifaffen gudu tamkar zai kure duniya, wannan saurayin ya wanzu yana keta dazuzzuka, kwazazzabai gami da koramu.

matashin saurayin mai suna Muzaffar yaci alwashin koda zai gamu da ajalinsa bisa ga batun mutane akan wurin daya nufa sai ya isa wannan wuri ya isar da bukatansa, shi dai muzaffar ya fito ne daga wata alkarya mai suna DUMBAZUR SAHIR, cikin birnin MARHABUR SIHIR,

birnin marhabur sihir birni ne da aka sana’anta shi da alkaluman tsafi hadi da sihiri, Birnin na karkashin wani azzalumin sarki ne mai suna basdur, duk da mutanen birnin marhabur sihir suna rayuwa cikin kunci gamida takurar rayuwa da suke fuskanta daga sarki Basdur, hakan bai sanya sun canja birni ba, domin kuwa gaba dayan biranen dake Alkaryan dumbazur sahir suma suna fuskantar kwatankwacin wannan ukuba da mutanen birnin marhabur sihir ke fuskanta.

Muzaffar ya cigaba da keta dazuzzuka yana tsala masifaffen gudu bisa kan dokinsa, babu abunda ke tsaida shi dare ko rana, komai duhuwar dare baya tsagaitawa da tafiya, burin muzaffar guda daya ne a duniya shine ya isa KOGON SARKIN ZAKUNA ya ciro FARATAN SARKIN ZAKUNA dun yiwa babban abokinsa kuma amininsa maganin cutar data kama shi.

lallai muzaffar yaci alwashi gamida alkawari bazai koma birnin Marhabur sihir ba batare da FARATAN ZAKI ba koda kuwa zai riski ajalinsa.

wata rana cikin ranaku muzaffar na tsala azababben gudu cikin daji kamar kullum, kwatsam babu zato babu tsammani sai dokin nasa yaja ya turje yaki gaba yaki baya, muzaffar ya zaburi dokin don yayi gaba amma dokin ya ki, maimakon ma dokin yayi gaba sai ya fara rimi yana kokarin kayar da muzaffar dake bayansa, cikin sauri muzaffar ya daka tsalle ya dirgo kasa, sannan ya fara karema hanyar kallo, ko shakka baya yi wani abun cutarwa dokin nasa ya hango masa, cikin yadda dakai ya zare takobinsa ya nufi hanyar.

ai yana kara gaba kunnuwansa suka fara dauko masa wani irin sauti mara dadin sauraro sautin yafi kama da a kirashi da sautin gurnanin wata mugunyar dabba, ai babu zato babu tsammani wani jibgegen mutum ya dirgo daga saman wata jibgegiyar bishiya dake kusa da muzaffar da niyyar ya dirgo a saman kan muzaffar, hucin zuwan mutumin ne ya sanya muzaffar saurin kallon saman kansa inda yai arba da katon yana kusantoshi, cikin azama ya kauce katon ya fado bisa kan kasa, muzaffar ya juyo ya dubi katon takobinsa a zare, katon da babu komai a hannunsa ya cigaba da gurnani yana kallon muzaffar yana dalalar da yawu daga bakinsa.

bayan dakiku biyu sai katon nan yayi kukan kura ya fada kan muzaffar, yana karisowa muzaffar ya sanya takobinsa ya tsargeshi gida biyu, nan katon ya fadi kasa matacce.

Muzaffar ya maida takobinsa cikin kufenta ya nufi dokinsa, yana niyyar hawa dokin kenan kunnuwansa suka sake dauko masa irin sautin gurnanin nan na baya, sannan lokaci guda irin kattin nan suka rika dirdirgowa daga saman bishiyun dake dajin, kafin wani lokaci har sun mamaye muzaffar, sudai wayannan karti adadinsu yakai dubu uku suna rike da yan kananun wukake masu kaifi, kartin suka fara dukan kirazansu suna wani irin gurnani tamkar zakuna, can suka dare sai ga wani jibgegen kato ya daro tsakiyarsu shidai wannan kato duk ya fisu girma da murmurde wan jiki, katon na rike da jibgegiyar guduma na bakin karfe a hannunsa.

koda karasowar katon sai ya dubi muzaffar cikin bacin rai yace “yakai wannan mutumin kai sani ka aikata mafi munin aika aika, ga dan uwanmu wanda hakan ya janyo maka hukuncin mummunan kisa daga gareni, ni Shu’ubaru dan jimganu nayi rantsuwa da jini abun sha, ga ni da mutanena da kuma naman bil’adama daya kasance abinci garemu, sai na sada ka da ajalinka sannan na zuke jinin jikinka da ranka na shanye daga karshe na riga yankan naman jikinka inaci, amma kafin nan bari na fara da wannan”

shu’ubaru ya damko gawar katon nan da Muzaffar ya tsargeshi gida biyu, ya wangame bakinsa yafara gatsar naman dan uwan nasu.

koda muzaffar yaga haka sai ya daka wa shu’abaru tsawa ya ce “yaku wayannan katti kuyi sani cewa ni matafiyi ne ban zo gareku da mummunan nufaka ba, asalima dan uwanku shi yai nufin kasheni ni kuma na kare kaina, dun haka ina mai baku shawara da tun wuri ku yi tafiyarku, muddin ko kukace zaku yakeni ina mai rantsuwa da taurari duk sai na sada ku da ajalinku.”

Shu’abaru najin kalaman muzaffar sai yaji tamkar muzaffar ya watsa mai ruwan zafi ne nan da nan yai wa mutanensa umarni da su shigewa muzaffar, nan fa wasu mutum biyu suka falfala da masifaffen gudu sukai kan muzaffar, ai suna isowa suka daka tsalle dukkansu suka kaiwa muzaffar munanan hari da nufin suyi masa kisan kwaf daya.

cikin salon bajinta da sanin tuggun gumurzu muzaffar ya wurkita jikinsa ya kauce wa harin kattin kuma lokaci guda cikin azama ya juyo ya fille musu kawuna da takobinsa, wannan abu yayi matukar kara harzuka shu’ubaru nan yaiwa mutanensa tsawa dukkansu sukai kan Muzaffar.

muzaffar ya gyara tsayuwa yana jiran isowarsu ai koda karisowarsu sai ya shigesu da sara da suka, nan fa ya wanzu yana mai sada su da ajalinsu, ya tsayu a tsakiyarsu tamkar iblishi, tamkar manomi na girbe a gona, suko suka yanyameshi tamkar farin annoba, nan fa kunnuwa suka kurumta da jin sautin komai face na karar takobi, da wukaken kartin nan, sassan jikkunan kartin suka ringa yawatawa a sararin samaniya, kasa ta fara rinewa da jini.

koda shu’ubaru yaga muzaffar sai ragargazar mutanensa yake sai ya fusata ainun ya kwarara uban ihu, daya karade dajin baki daya ya kuma haddasa tsayuwar yakin, shu’ubaru ya daka wa mutanensa tsawa yace “ku gafara can malalatan banza ace mutum guda ya gagareku, “.

Shu’ubaru ya jinjina gudumar dake hannunsa sannan yai kururuwa yai kan muzaffar, ganin haka shima muzaffar yayi kukan kura ya dunfari shu’ubaru da takobinsa tsirara

sai da ya rage baifi zira’i uku tsakaninsu ba ai sai Muzaffar ya daka uban tsalle a saman yai juyi ya kawo ma shu’ubaru mummunan sara a wuya da nufin ya raba zumuncin dake tsakanin kanshi da gangar jikinsa, cikin sauri shu’ubaru ya kare saran da gudumar hannunsa, sabida karfin saran sai da shu’ubaru yayi baya.

muzaffar bai tsagaita ba ya cigaba da kaiwa shu’ubaru mugayen sara da takobinsa shu’ubaru na karewa shima yana kawo masa munanan duka da gudunar dake hannunsa muzaffar na gocewa, nan fa suka wanzu suna kaiwa junansu munanan hare hare cikin bakin nufaka da nufin yiwa junansu kisan gilla, shidai shu’ubaru kokari ya ke ya dagargaza kan Muzaffar da Gudumarsa, shiko muzaffar kokari yake ya soke shu’ubaru da takobinsa a ciki.

Ragowar baradan shu’ubaru suka tsayu suna kallon masifaffen gumurzun dake wakana tsakanin shugabansu da muzaffar cikin tsoro da rudu, gani suke a kowanne lokaci muzaffar zai iya samun lagon shugaban nasu,
koda shu’ubaru yaga wankin hula na neman ya kaishi dare sai yai kukan kura ya yadda gudumarsa ya dubi muzaffar yai masa inkiya daya shigo, muzaffar ya zaburo ya kawo mai sara caraf shu’ubaru ya rike masa hannu, kafin muzaffar yai wani yunkuri tuni har ya gabza mai naushi a ruwan ciki, muzaffar yayi baya kamar zai fadi, shu’ubaru ya sake yibmasa inkiya daya shigo, nan fa muzaffar ya fusata yai karaji ya falfala da masifaffen gudu zuwa kan shu’ubaru koda ya kusan karisowa gabansa sai ya daka tsalle yai sama ya sanya kafarsa da nufin ya doki shu’ubaru aka nanma shu’ubaru yai caraf ya rike kafar tasa yai wulli da shi, muzaffar ya fusata matukar fusata ya mike yana nishi bakinsa na fitar da hayaki ya kifu akan shu’ubaru suka kacame da sabon azabben gumurzu suka wanzu suna kaiwa junansu naushi da bugu hadi da mangari, a wannan gumurzu sai da shu’ubaru yai wa muzaffar kaca kaca, kasancewar ya fishi karfin damtse kuma naushinsa na da matukar nauyi sabanin na muzaffar, tun muzaffar na iya kai duka har ya zamanto baya iyayi, kare kansa ma dakyar yake yi.

shu’ubaru ya shammaci muzaffar ya sureshi da nufin ya kifa da wani jibgegen dutse dake kusa da su, sai da ya daga muzaffar sama ai sai muzaffar ya wurkita jikinsa a saman ya ya sanya dukkan karfinsa ya damki kan shu’ubaru ya hada da dutsin, kan ya dagargaje a jikin dutsin, shu’ubaru ya kife matacce, ragowar baradansa da suka ga abunda ya afku ga shugabansu kuma dama tuni sun tsorata da al’amarin muzaffar sai suka tsorata suka fada daji a guje.

muzaffar ya mike ya shafa magani a raunin daya ji sannan ya kama dokinsa ya hawa ya zabureshi ya cigaba da tafiya….

Zamu cigaba jibi
in Allah ya kaimu da rai da lafiya

02 of 4 Part 2

Part 2

FARATAN ZAKI
Littafi na daya 1
na Shuraihu Usman
Part B

Sai da muzaffar ya shafe kusan kwanaki talatin yana keta daji batare daya gamu da wani abun cutarwa ba.

a kwana na talatin da daya ne yana kan tafiya sai ya hango wani tsoho kwance cikin jini ga wata jibgegiyar kure na yunkurin far masa,

koda muzaffar yaga abunda ke shirin faruwa ga dattijon nan kuma yaga muddin kuren nan ya kariso gareshi labudda sai ya kasheshi cikin zafin nama muzaffar ya dako tsalle daga kan dokinsa ya dira a gaban kuren, daidai lokacin da kuren ya yi tsalle zai farwa dattijon nan.

kwatsam sai muzaffar ya dire a gaban tsohon kuren ya fado a jikinsa, muzaffar ya daga kuren da iyakacin karfinsa ya maka da kasa, kuren ya mike a fusace yana gurnani yana kallon muzaffar kafin ya yi sake yin tsalle a karo na biyu ya fada kan muzaffar suka kaure da kokawa, kuren na kokarin sanya hakwaransa ya farke wuyan muzaffar, shi kuma muzaffar na kokarin sake daga kuren ya maka da kasa.

suna cikin kokawanne Muzaffar ya zaro wata karamar wuka daga kuibin cinyarsa ya luma wa kuren a wuya, kuren yayi ihu gamida yin gefe jini na zuba daga wuyarsa. daga nan ya gudu cikin daji

muzaffar ya juyo wurin da dattijo ke yashe a kasa ya sameshi jina jina, cikin halin mutuwa cikin sauri ya tsuguna ya tallafo kan dattijon sannan ya dauko salkar ruwansa ya kafa wa tsohon a baki, tsohon ya ture salkar ruwan daga bakinsa ya dubi muzaffar yace cikin shakakkiyar murya “yakai wannan sadaukin saurayi, hakika kayi niyyan cetona daga sharrin kuren nan amma bakin alkalami ya bushe, domin ko shakka babu nasan mutuwa zanyi amma kafin na mutu ina son na sanar dakai cewa nan gaba kadan zaka riski wani birni mai suna Lamfur, su mutanen wannan birni suna da wata dabi’a na ciyar da bako da zarar ya sauka a garinsu ina horonka da kada ka yarda ka ci ko kasha daga dukkan abun da zasu baka, domin kuwa mutanen birnin Lamfur sun kasance suna bautan wani shedanin aljani ne mai suna Hurratu, kuma a kowanni kwanan duniya suna yanka wa aljani hurratu bil’adama yasha jininsa, hakan yasa duk lokacin da bako ya sauka a birnin suke baibayeshi da abinci wanda suka tsafance, da zarar mutum yaci wannan abincin nasu zai fadi sumamme, daga nan zasu daukeshi su kaishi wurin da suke ajjiye mutanen da suka kama,” dattijon ya dakata ya yi doguwar nishi kafin ya cigaba “da zarar ka shiga birnin to kada ka sake kaci wani abu acikin birnin har sanda zaka fita, muddin ka kiyaye hakan to labudda zaka tsira daga sharrin Al’ummar Lamfur” tsohon na zuwa nan a zancensa rai ya yi halinsa.

muzaffar ya haka rami ya binne gawar dattijon nan sannan yaci gaba da tafiya,

Bayan ya shafe kwanaki biyu yana tafiya sai ya iso birnin lamfur, ya hangi kofar birnin babu masu tsaro, cikin dakewa da yarda dakai ya shiga cikin birnin,

da shigar muzaffar cikin birnin sai yayi arba da yaro karami dauke da akushi akansa, yaron na karisowa gaban muzaffar ya ce “yakai wannan matafiyi barka da shigowa birnin lamfur ma’abociya ni’ima, cewa ni shugabana ya umarce ni dana tsayu a anan wurin duk wanda ya shigo cikin birnin nan na ciyar da shi daga akushin dake kaina,” yaron na gama fadin haka ya miko wa muzaffar akushi.

Muzaffar ya sauko daga kan dokinsa ya amshi akushin yai duba ga cikinsa, yai arba da gurasa da zuma, muzaffar ya manta gargadin da dattijo yai masa ya sanya hannu ya dau gurasar nan da nufin ya kai bakinsa, nan take sai ya tuna da gargadin da dattijo yai masa, ya tsaya cak da gurasar a hannunsa ya kasa kai gurasar bakinsa ya kuma kasa yar da ita, daga can sai ya ajjiye gurasar a cikin akushin ya mikawa yaron akushin ya ce “nagode sosai bisa wannan kyauta taka, yakai wannan yaro, sai de sam ba zan iya cin abincin nan ba”

Sanadin kidnapping hausa novel complete

yaro ya bude baki cikin mamaki yace “kai ko ina dalilin kin cin abincin nan naka, cewa kai ka kasance matafiyi daya shafe kwanaki yana tafiya babu abinci sannan yanzu an gabato ga abinci gareka kana kaki ci”

muzaffar yayi murmushi sannan ya dafa kan yaron bai ce da shi komai ba sai ya wuce abunsa ya shiga cikin gari,

duk inda muzaffar yabi a cikin birnin lamfur sai mutane su rika yi masa tayin abunci, shi kuwa yana ce wa ya gode,

ai koda mutanen Lamfur suka ga Muzaffar yaki cin abincinsu sai suka fusata suka taru suka rufar masa da nufin suyi masa na karfi su ciyar da shi, muzaffar na ganin haka ya zare takobinsa ya daka musu tsawa ya ce “yaku jama’ar lamfur nayi rantsuwa da taurari ababen bautawa agareni duk wanda ya gabato gareni daga cikinku da muguwar nufaka sai na aikashi duniyar nan da in an tafi ba’adawo wa, na maishe da yaransa marayu, matansa su kasance zawara, inda mai inkari akan maganata sai ya kusanto ni yaga”

Jama’ar birnin lamfur suka fusata da jin kalaman muzaffar, suka afkamasa da yaki, muzaffar ya fada cikinsu da yaki yana mai sara da sukansu, su ko suka wanzu suna kara kusantar muzaffar yayin dayake sada su da ajalinsu, yayin da suka farga ga irin barnar da muzaffar keyi musu suka kaga ya raunata musu mutane ba’adadi duk da bai kashe kowa, ai sai suka ja baya.

a sannan ne muzaffar ya hango kura ta turnuke gabashin birnin, nan fa ya tsayu yana duban wannan guguwa koda guguwar ta gabato garesu sai yaga gagarumar rundunace ta mayaka cikin shigan yaki sun durfafosu,

wannan runduna dai ba rundunar kowa bace face ta sarki Huntaru bin Jaujas tare da dakarunsa, Tuni labari ya kaiwa sarki huntaru cewa wani badakare ya shigo kasarsa ya hanu ga cin abincin da mutanensa suka bashi wanda musabbabin hakan ya sanya jama’ar birnin suka far masa inda ya ruga Raunata masa mutane. hakan ya sanya sarki huntaru yin hawa da kanshi don kawar da muzaffar daga ban kasa.

koda karisowar dakarun nan sai suka tsaya a nesa da muzaffar sarki huntaru ya karewa muzaffar kallo cikin bacin rai da fusata ya nufo gareshi, ai koda muzaffar yaga haka sai yai maza ya gyara rikon takobinsa yana tsumayen isowar sarki huntaru…

03 of 4 Part 3

Part 3

Sarki huntaru na karisowa gaban muzaffar sai ya tsaida dokinsa sannan ya sauko daga kan dokin ya durfafi muzaffar cikin takun kasaita, koda isowarsa gaban muzaffar sai ya rungune muzaffar a jikinsa yana mai cewa “lale marhabun da gwarzon jarumi cikamakin sadaukai, yarima muzaffar ibn Azlam, wanda ya ya baro birnin Marhabur Sihir don zuwa kogon Almadud a bisa lalurar dan uwanka kuma Amininka Yarima Rabbasu ibn Zurkimu”

Muzaffar yayi mamaki da yadda akai sarki huntaru yasan al’amuransa ya ce ” yakai wannan sarki shin taya akai ka sanni har ma kasan dan uwana da abunda ya afku gareshi da kuma inda na nufa”

sarki huntaru najin haka ya babbake da dariya mara dadin sauraro ya ce “hakika Al’amuranka sun bayyana gareni cikin sha’anin tsafina tun gabanin zuwanka wannan birni nawa, yakai muzaffar kayi sani cewa ina dauke da kyakkyawan albishir a gareka, cewa ni nayi sani da inda aka taskance Taswirar Kogon Almadud da akewa lakabi da kogon Zakuna.”

Koda muzaffar yaji ce wa sarki huntaru yasan inda taswirar zuwa kogon zakuna take sai ya fadada fuskarsa da murmushi ya ce “Yakai wannan sarki mai ababen mamaki da al’ajab kai ko ya akai kasan inda aka taskance taswirar kogon zakuna alhalin manyan bokaye sun tabbatarmin da jinin Almadud ne kadai yasan inda taswirar kogon zakuna yake shin kai jinin Attajiri Almadud ne”

sarki huntaru ya ce “ko da ya ni bankasance jini daga zuri’ar attajiri almadud ba, amma nayi sani da abubuwa da dama da suka jibance shi, yanzu dai ina baka hakuri abisa abunda jama’a ta sukai maka sannan ina mika gayyata ta a gareka da mutafi izuwa fadata ka huta kaci abinci daga nan na sanar dakai dukkan wasu abubuwan da kake bukatar sani gameda Attajirin Duniya Almadud.

Muzaffar yabi sarki huntaru da rundunarsa suka karasa fadarsa, bayan sun isa fadar ne sarki huntaru ya sanya aka baiwa muzaffar babban Masauki inda ya saba saukan manyan mutane masu daraja.

koda muzaffar ya yi wanka ya huta gajiyar da ke jikinsa, aka gabato mai da abinci kala kala na daga dangin kayan lambu da ababen sha nadaga ruwan inibi, sai a sannan yunwar muzaffar ta motsa ya gabato gaban abincin da nufin faraci nan take sai ya tuna da gargadin da dattijo yai masa.

ya fasa cin abincin yaje ga jakar guzurinsa ya duba ko zaiga ragowar abincinsa, ya tarar da jakar babu komai a ciki, abunda ya bashi mamaki kenan domin kuwa ya taho da naman barewa a cikin jakar tasa.

yana a cikin wannan haline sarki huntaru ya shigo cikin turakar ya tarar da shi, sarki yai dubi ga tarin kwanukan abincin dake gabansa yaga ko daya ba’a taba ba ya dubi muzaffar ya kauda kai, muzaffar ya mike tsaye zumbur yai gaisuwa gareshi sannan sarki huntaru ya zauna kusa da muzaffar ya ce “tun da ka huta kuma ka kimtsa cikinka da abinci, to ina saurarenka me kake son sani daya danganci Almadud da Kogon zakuna”

muzaffar ya numfasa ya ce “Na baro gida ne bisa wata lalura ta rashin lafiya data afkama dan uwana, yarima Rabbasu na shanyewar barin jiki, kuma bokaye sun tabbatarmin da cewabba zai taba warkewa har sai naje kogon zakuna, na samo FARATAN kafar sarkin zakuna na kogon, na mikashi garesu domin hada wani maganin da zai warkar da dan uwana, wannan yasa nayi shiri na baro gida na nufi wurin wani hatsabibin boka a nahiyarmu mai suna Balbalin bala’i, koda na isa ga boka bal balin bala’i na sanar da shi bukatata na zuwa kogon zakuna sai ya kwantsama kara mai firgitarwa ya tumu da kasa ya dubeni ya ce ” kai yaro karyarka tasha karya, baka isa ba kuma baza ka isa ba”.

yayin dana ji kalaman boka bal balin bala’i sai raina ya harzuka na dubeshi da duba irin na jarumai na daka masa tsawa na ce “karyane, ni Muzaffar dan Azlam naci alwashin sai na isa ga kogon zakuna na idda bukatata na kashe sarkin zakuna na yanko faratansa don aiwa dan uwana magani, na rantse da taurari ababen sheki a cikin duhu, duk wanda ya shiga tsakanina da wannan buri nawa sai na sada shi da ajalinsa”

boka bal balin bala’i ya tsayu a gabana yana saurarona bayan na idda ya ce “hakika naga kafewa da zuciyar jarumta a tattare dakai samari amma ina mai baka shawara daka koma gida kayi zamanka ka more sauran ranakun da suka rage wa dan uwanka kana tare dashi, domin kuwa Matsafa, bokaye, Attajirai, jarumai da saudaukai bila haddin sun rasa rayukansu bisa wannan tafarkin naka. yakai wannan saurayi kayi sani cewa duk duniya babu wanda ya taba zuwa kogon zakuna ya dawo a raye hasalima duk duniya a yanzu babu wanda yasan inda kogon ya ke.”

koda muzaffar yaji haka sai ya mike tsaye ya ce “Nayi rantsuwa da taurari gamida cin alwashi a wannan fita tawa bazan koma gida ba sai da FARATAN ZAKI, koda kuwa zan rasa rayuwata, sai de na rasa bisa bukatata, nazo ne gareka dun ka taimakeni ka dora ni bisa hanya.”

Boka balbalin bala’i shima ya mike tsaye ya dafa kafadar muzaffar ya ce “an gaisheka jarumin jarumai NAMIJIN GASKE, kwarin guiwarka ta burgeni a sabida haka zan sanar dakai yadda zakai ka isa kogon zakuna, kamar yadda na sanar dakai a baya yanzu a wannan zamani babu wanda yasan inda kogon zakuna yake a wannan duniyar, shekaru dari uku da suka shude ne aka samar da kogon zakuna ta hanyar alkaluman tsafi, sannan an sana’anta wata taswira wadda zata sada mutun ga kogon, wannan labari dana ke baka kakana ne ya sanar dani kuma yana daga cikin bokayen da suka sana’anta kogon zakuna, kuma a yanzu a wannan zamani da muke ciki babu wani wanda yasan labarin tasiwirar kogon zakuna in ba ni ba.

kakana ya sanar dani cewa alokacin nan Attajiri Almadud Mafi daukaka da arziki daga dukkan attijiran duniya, yayi nufin ya taskance tarin dukiyarsa da ya mallaka a duniya wayanda yawansu bazai fadu ba kuma bazai misaltu ba, Awancan zamanin Almadud ya mallaki zinariya, lu’u lu’u, zubarjadi,yakutu fiye da dubu zambar bisa dubu zambar, ance a lokacin nan nahiya guda aka kebance aka zuba dukiyar attajiri Almadud. azamanin attajiri almadud ya juya duniya a tafin hannunsa domin ko yana da dakaru dubu zambar bisa dubu zambar daga jinsin mutane da aljanu.yayin da ajali ya kusanto wa attajiri almadud sai ya kebe da bokayensa su dubu dari shida ya sanar da su cewa “yaku manyan bokayena kuma dirakun dake rike da dukkan kadamina, kun sani cewa na mallaki dukiya mai yawa wadda ni kaina bansan adadinta ba, hakanan gashi ajalina ya kusantoni, kuma gashi haryanzu bana da magajin da zan iya barin masa wannan tarin dukiya tawa, lallai nayi sani muddin akace babu ni na mutu to tabbas al’umma da dama zasuyi kokarin mallakar dukiyata wanda hakan zai jawo ZUBDA JINI a bankasa. ko kadan bana bukatar wani abu makamancin haka ya faru ta dalilina don haka na zo gareku domin ku sana’anta mini wani kogo bisa ilimin alkaluman tsafi da zan ajjiye dukiyata a ciki, yadda babu wani dan adam ko Aljanin da zai iya isa gareta. don gujewa zubar da jini a ban kasa”

yayin da bokayen nan su dubu dari shida sukaji jawabin Attajiri almadud sai shugabansu ya gabato gaba ya ce “ya shugabana hakika abunda ka fada na daga dukiyarka gaskiya ce nan gaba, al’ummar duniya zasu riga kokarin mallakar dukiyar ka wanda hakan zai jawo mummunan zubda jinin da ba’a taba irinsa ba a tarihin duniya. sai dai ka sani ya shugabana Bayan mutuwarka da watanni hudu matarka Zulfulaifa zata haifi ‘ya mace, amma ita kanta yartata baza ta samu koda dirhami guda na daga dukiyarka ba. bisa bincikena na gano cewa tsatsonka na nan gaba sune zasu mori dukiyar, zasu ketare duk wani hadari su isa ga kogon da zamu boye dukiyar inda kuma a karshe zasu mallaki dukiyar taka.”

Attajiri Almadud yayi farin ciki da jin cewa bayan mutuwarsa matarsa zata haihu, amma kuma yayi bakin ciki kasantuwar bazai samu dman ganin jaririyar ba hakanan yar tasa bazata mori komai daga dukiyarsa ba. nan da nan ya baiwa bokayen umarni da su sana’anta KOGON ZAKUNA.

sai da bokayen suka shafe shekaru uku cur suna aikin sana’anta kogon sannan suka iddar, suka aikata aikin sihiri bisa alkaluman tsafi suka samar da zakuna sama da dubu zambar a cikin kogon, kuma suka shafe kogon daga ban kasa tayadda babu wani mutum ko aljan daya isa ya gano ind yake. sai dai bokayen sun sana’anta Taswirar kogon wanda suka killaceta acan wani wuri wanda babu wanda ya sani. sannan suka sake aikata wani aikin sihiri wanda nan gaba taswirar zai bayyana kansa ga jinin Attajiri almadud.” koda boka balbalin bala’i yazo nan a zancensa sai y dubeni yace “to saurayi kaji iyakacin abunda na sani gameda Kogon zakuna, kuma wannan bayanin dana sanar dakai a yanzu haka duk fadin duniya babu wanda ya sani sai ni dakai”
daga nan na sallami boka balbalin bala’i na kamo hanya zuwa ga muradina na cigab d tafiya dare da rana har na iso wannan birni naka ” Muzaffar na zuwa nan a zancensa ya kai hannu ya dau kofin inibi zai bakinsa sai kuma ya fasa ya ajjiye ya ce “yakai wannan sarki kaji dukkan labarina, yanzu kai nake jira ka sanar dani inda Taswirar kogon zakuna take”…

04 of 4 Part 4

Part 4

sarki huntaru ya sauke ajiyan zuciya bayan gama sauraran labarin muzaffar ya dubi muzaffar ya ce “hakika kam kamar yadda boka balbalin bala’i ya sanar dakai cewa duk duniya babu wanda yasan inda taswirar zuwa kogon zakuna yake, haka batun yake, sai dai a shekarun baya manyan matsafa da bokayen duniya sunyi zama inda suka hada karfi da karfe wurin ganin sun binciko inda taswirar take amma sun gagara, kai daga karshe ma sai da rabinsu suka hallaka daga cikin wayanda suka tsira akwai wani hatsabibin boka mai suna dundamu, boka dundamu shine kadai ya iya gano inda taswirar kogon zakuna yake. “

cikin Zakuwa muzaffar ya ce “ina ne taswirar take”
sarki huntaru yayi murmushi ya ce “ka kwantar da hankalinka ya namijin kwarai, da sannu zan sanar dakai abunda ka ke bukatar sani “
sarki huntaru ya dau ruwan inibin dake gaban muzaffar ya kwankwada bayan ya kwankwada sai ya fara baiwa muzaffar labari kamar haka “kamar yadda na sanar dakai a baya boka dundamu yayi nasarar gano inda taswirar kogon zakuna yake, kamar yadda bokayen Attajiri Almadud suka shara’anta cewa taswirar ba zai bayyana kanshi ba sai ga ahalin almadud, to bayan kimanin shekaru dubu biyu, a can yankin bakaken fata a taswirar ta bayyana a cikin birnin Burkatus Aswad.

shidai birnin burkatul aswad na karkashin mulkin wata sarauniya ce wacce bata kasance bakar fata ba mai suna Badariyya, ita dai badariyya ta kasance daya daga cikin tsatson Attajiri Almadud. sarauniya badariyya ta kasance yar kasar hindu ce, sarkin Burkatul Aswad ne mai suna Marutu yaje har birninsu ya auro mahaifiyarta, ya kuma zauna a birnin na hindu har sai da mahaifiyar Sarauniya badariyya ta haihu sannan ya kamo hanyar dawowa kasarsa.

bayan Rasuwarsa ne Yarsa Sarauniya Badariyya ta haye kujeran sarautarsa ta cigaba da shimfida mulki, gwargwardon yadda mahaifinta yake, ta tsayu bisa ga talakawanta tana aikatawa garesu aikin alheri, har wata rana Taswirar Kogon zakuna ya bayyana gareta cikin dare.

yayin nan tana kwance cikin turakarta sai tayi mafarki a cikin mafarkin taga Wani tsoho fari sol yana haye bisa doki na zinare sannan ga mutane nan birjik a zagaye da tsohon dukkansu suna tafe bisa dawakan da aka sana’anta da zinare. yayinda tsohon ya kariso gareta sai ya sauko ya nufota ya ce “Lale marhaban da jikata Sarauniya badariyya cewa ni ne kakanki Attajiri Almadud mafi daukaka da arziki daga dukkan sarakuna da attajiran duniya, yake jikata hakika ni na adana gareki dukkan dukiyata na daga dangin zinare,lu’u lu’u,jauhari,zubardaji da yakutu hadi da dukkan hadimaina na Aljanu.” tsohon na zuwa nan a zancensa ya dauko wata jan takarda daga aljihunsa da aka sana’anta da ruwan zinare.

ya mika wa sarauniya badariyya ya ce “riki wannan taswira ya jikata, itace zata sadaki da kogon dana adana dukiyarki, kuma a tare da wasikar nan akwai manyan hadimai na Aljanu da zasu jagoranceki zuwa ga kogon zakuna” sarauniya badariyya ta amshi taswirar daga hannun almadud, fuskarta cike da mamaki ta ma kasa furta koda kalma daya, a haka Tsohon ya juya yaje ya haye bisa ga dokinsa na zinare ya juya shida sauran mutanen dake tare da shi.

Sarauniya badariyya na zuwa nan a mafarkinta sai ta farka firgigit, ta na dube dube. koda ta tsinci kanta bisa ga luntsumemen katifarta sai ta sauke ajiyar numfashi ta sakankance mafarkine tayi. tana shirin ta koma ga kwanciyarta kenan idanuwanta suka sauka kan abunda yai matukar bata mamaki, ba komai ta gani ba face wani Jan takarda abun sana’antawa da zinare yana sheki da daukar idanu, hasalin abun mamakin ma shine takardar yana bisa kan iska ne baya sama kuma baya kasa.

Sarauniya Badariyya ta nufi wannan takarda cikin mamaki da al’ajab ta dau takardar, ta iske babu komai cikin takardar face wasu zanuka da bata gane ko zanen mene ne ba. nan da nan sai mafarkin da tayi ya fado mata a rai ta sakankance wannan taswira itace wannan dattijo ya mika mata.

tana a cikin wannan hali ne, wani aljani daga dangin fararen al’janu ma’abocin kyawun sura ya bayyana gareta yana mai dukawa kasa ya gaisheta ya ce “ya shugabata hakika ni nakasance daga cikin bayin kakanki Attajirin duniya Almadud kuma ya umarceni dana damka wannan taswira ga hannunki, cewa wannan taswira ita zata jagoranceki ga bigiren da mahaifinki ya adanta dukiyarsa mai tarin yawa da baki bazai iya fadan yawansu ba.”

sarauniya badariyya ta ce “kai kuwa ya ya sunanka sannan ni nakasance cikin bata da wannan al’amari daya ke gudana gareni”

Aljani ya ce “, Suna na Harijul Burkatu ni ne sarkin fararen Aljanun duniya baki daya kuma ni na kasance bisa da’arki cewa ki shugabata ce” A nan Aljani Harijul Burkatu ya kwashe dukkan labarin Attajiri Almadud da yadda ya taskance dukiyarsa a bigiren da babu wanda ya sani.

sarauniya badariyya ta yi mamaki ainun da labarin da Aljani Harijul burkatu ya bata ta sake duba taswirar Kogon zakuna tana tu’ajjibi.

tun daga wannan rana sarauniya Badariyya ta taskance Taswirar kogon zakuna a tare da ita. ya zamana ta sanya madinki ya nade ta ya mayar da ita laya ta rataya layar bisa wuyarta.
Bayan Sarauniya Badariyya tayi aure ta haifi ‘ya mace kyakkyawa ta gaban kwatance wadda masana da bokaye suka yi ittafakin duk duniya babu mai kyawunta. sarauniya ta sanya wa yarta suna Zatal dawahi sannan ta cire layar nan daga wuyarta ta sanya bisa ga wuyar yarta.

*** *** ***
shi ko al’amarin boka dundamu bayan yayi nasarar gano inda taswirar kogon zakuna take sai ya isa ga bigirenshi dake can gabashin birnin sin a wani tsibiri mai suna Tsibirin Jauhari.

boka dundamu yayi gagarumin shirin tunkarar Sarauniya badariyya da nufin kwatar Taswirar kogon zakuna daga hannunta, bayan ya gama shirinsa ya fasaltu da irin shigar Bokaye wanda muddin mutum yai arba dashi sai ya girgiza, nan take ya bace bat daga kogon tsafinsa.

boka dundamu bai bayyana a ko ina ba sai a bayan birnin Burkatul Aswad inda sarauniya Badariyya ke mulki, to dama su mutanen burkatul aswad sun kasance bisa tafarkin ibrahimiya ne wato su musulmai ne. bayan da boka dundamu ya bayyana a bayan birni sai ya juye kamaninnsa ya zuwa kamilin dattijo sanye da shiga ta kamala ya shiga cikin birnin, kai tsaye bai wuce ko’ina ba sai fada inda ya iske Sarauniya badariyya na bisa kan karagar mulki, ga yarta Zatal dawahi a gefenta. a wannan lokaci zatal dawahi na da shekaru goma sha tara. in ka gansu a hakan sai ka zata watanni ne, dattijo ya fadi gaban Sarauniya yayi gaisuwa sarauniya ta tambayeshi me ke tafe da shi.”

boka dake cikin suffar dattijo kamilalle ya ce ” yake sarauniyarmu mai adalci da karimci wata musiba ce ta afka gareni na rasa dana daya tilo dake taimakamini a bisa ayyukan gona, kuma gashi tsufa ta riskeni bana da isasshen karfin da zan iya wani aiki”

yayin da sarauniya taji kalaman dattijo sai tausayinsa ya shigeta, ta dubi sarkin fada dake gefenta ta ce ” ya Mas’udu ka tafi da wannan dattijo izuwa ga taska ya debi dukkan abunda yake bukata na daga dirhami sannan akai buhun hunan hatsi dubu gidansa.”

Sarkin fada ya ce ” Naji na kuma bi ya shugabata” nan da nan ya mike ya dubi dattijo yace ” muje”. dattijo ya mike sai ya faki idon kowa yayi wuf ya nufi zatal dawahi ya kai hannu wuyanta da nufin fincikar layar dake wuyan nata, ai sai yaji hannunsa ya makale a wuamyar zatal dawahi gashi dai ya damki layar amma ya kasa sarrafa hannunshi, Sarauniya badariyya da sauran Fadawanta da dakarunta suka mike zumbur ind sarkin yaki Afaladinu ya zare takobinsa ya datse hannun boka dundamu dake rike da layan zatak dawahi.

boka yayi ihu yayi kururuwa saboda zogi da zafin da suka ziyarce, Sarkin yaki sake kawo masa sara karo na biyu da nufin datse kansa ganin haka boka dundamu ya ambaci wasu kalaman tsatsuba ya bace bat.

tsulum ya bayyana Bigirensa dake Tsibirin Jauhari cikin kogon tsafinsa nan da nan. ya fara ambaton kalaman surkelle yana hamhama yana dandama bakinsa na fidda hayaki, a haka ya wanzu yana mai ambaton dalamisan tsafi har bayan watanni biyu, to asannan ne guntulallen hannunsa ya tsiro da kansa, ka ce shi yakasance tushen bishiya ce.

Boka dundamu yayi bincike a halwar tsafinsaa ya gano cewa duk duniya babu wanda ya isa ya taba wannan layar dake wuyan Zatal dawahi sai ire iren zuri’ar Attajiri Almadud, hasalima an sana’anta wani dako da baya barin kowa ya taba taswirar fa ce Jinin attajiri almadud. yayin da boka dundamu ya gano wannan lamari a halwar tsafinsa sai ya takarkare ya kwarara ihu dayai amsa kuwwa a gaba dayan fadin tsibirin jauhari sannan ya fashe da kuka ganin burinsa na mallakar Dukiyar Attajiri Almadud baza ta cika ba.”

bayan da sarki huntaru ya zo nan a labarin da yake baiwa Muzaffar sai ya dada daukar tambulan na ruwan inibi ya kora ya ce ” to kaji labarin Tasiwirar kogon zakuna, da kuma inda yake ni yanzu zan fita na dawo gobe nai maka rakiya izuwa yankin kasata”

sarki huntaru ya fice daga turakar ya bar muzaffar cikin tunanin ta yadda zai sadu da Tasiwarar kogon zakuna don isa can kogon ya yaki sarkin zakuna ya ciro farcensa ya kawo aiwa dan uwansa magani…

Anan na kawo karshen littafi na daya 1 Muhadu a littafi na biyu don jin sauran labarin.
Naku Shuraih Usman – 08140419490 ke cewa na barku lafiya cikin koshin lafiya…

© Shuraih 99% – Hausaebooks 2020

wasu daga cikin littatafan marubucin
GUMURZUN ABOTA
SADAUKI UBAN SADAUKAI
TAKOBIN JINI
NAMIJIN GASKE

Join Our Telegram Group
Join Our Twitter page
Join Our Facebook page
Join Our Youtube Channel

Join Our Telegram Group

Download Hausa Films

Get real time updates directly on you device, subscribe now.

Leave A Reply

Your email address will not be published.